មនុស្យម្នាក់ៗ តែងតែមានការគិតខុសគ្នាៗ ហើយក៏មិនមែននៅក្មេងរហូតដែរ។ វាគង់តែដល់ពេលមួយអ្នកក្លាយទៅជាមនុស្សចាស់ទុំដោយមិនដឹងខ្លួន។ សញ្ញាខាងក្រោមនេះ នឹងបង្ហាញអ្នកឲ្យដឹងថា អ្នកចាស់ទុំជាងអ្វីដែលអ្នកគិតទៀត ទោះបីជាអាយុពិតរបស់អ្នកមិនច្រើនក៏ដោយ៖
១. អ្នកយល់ព្រមផ្លាស់ប្ដូរគ្រប់យ៉ាង៖ អ្នកលែងចង់នៅតែមួយកន្លែងទៀតហើយ។ មានន័យថា អ្នកចង់ផ្លាស់ប្ដូរធ្វើអ្វីដែលអ្នកចង់ធ្វើ អ្វីដែលអ្នកចង់ឃើញ និងទីកន្លែងដែលអ្នកចង់ទៅ។ ពេលនេះបង្ហាញថា អ្នកលែងដូចមុនទៀតហើយ ដោយសារគំនិតកាន់តែចាស់ទុំ ហើយអ្នកកាន់តែចង់ផ្លាស់ប្ដូរច្រើន។
២. អ្នកចាប់ផ្ដើមគិតថា «ប្រឹងធ្វើការងារនោះអ្នកនឹងសប្បាយ»៖ អ្នកលែងគិតថា ការសប្បាយគឺកើតចេញមកពីស្នេហា ឬការដើរលេងទៀតហើយ។ ពេលអ្នកមានគំនិតកាន់តែចាស់ទុំទៅ អ្នកនឹងគិតថា ទាល់តែអ្នកខិតខំធ្វើការងារបានល្អ ទទួលបានប្រាក់ខែល្អសម្រាប់ខ្លួន ពេលនោះភាពសប្បាយពិតនឹងកើតមានឡើងសម្រាប់អ្នក។
៣. អ្នកលែងធ្វើឲ្យឪពុកម្ដាយខ្វល់ទៀត៖ មកដល់ពេលនេះ អ្នកធ្លាប់ឆ្លងកាត់អស់ហើយរឿងទាំងឡាយដែលធ្វើឲ្យឪពុកម្ដាយមិនសប្បាយចិត្ត។ ហេតុនេះ អ្នកនឹងមិនធ្វើឲ្យវាកើតមានសារជាថ្មីទៀតទេ ព្រោះថាពេលនេះអ្នកជាមនុស្សមានចិត្តចាស់ទុំចេះដឹងខុសត្រូវហើយ។
៤. អ្នកចាប់ផ្ដើមគិតថាគ្រួសារគឺសំខាន់ជាងមិត្តភ័ក្ដិហើយ៖ ជឿថាពេលដែលអ្នកនៅក្មេង អ្នកឲ្យតម្លៃមិត្តភ័ក្ដិអ្នកធំជាងគ្រួសារ ដោយសារអ្នកជិតស្និទ្ធនឹងមិត្តជាង។ តែពេលអ្នកធំទៅ អ្នកចាប់ផ្ដើមយល់ហើយ ពីតម្លៃនៃក្រុម គ្រួសារខ្លួន។
៥. អ្នកអាចនៅម្នាក់ឯងបាន៖ ការនៅម្នាក់ឯង គឺអ្នកណាៗក៏គេចមិនផុតដែរ។ ការនៅម្នាក់ឯង នឹងបង្រៀនអ្នកឲ្យរស់នៅឯករាជ្យ កុំពឹង ពាក់លើគ្រួសារ។ ហើយបើអ្នកអាចធ្វើបាន អ្នកជាមនុស្សដែលមានគំនិតចាស់ទុំ អាចធ្វើអ្វីដោយខ្លួនឯងបានទាំងអស់ហើយ៕
