១០គន្លឹះ ដោះស្រាយបញ្ហាជំងឺ គេងមិនលក់

តើអ្នកធ្លាប់ទទួលរងឥទ្ធិពលពីជំងឺគេងមិនលក់ដែរឬទេ? ជាក់ស្តែង​ ជំងឺគេងមិនលក់ ឬ insomnia ធ្វើឱ្យអ្នកមានអាការៈពិបាកក្នុងការគេងឱ្យបានទៀងទាត់ ហើយអ្នកអាចព្យាបាលជំងឺនេះដោយផ្លាស់ប្តូរទម្លាប់គេងរបស់អ្នកវិញ។

ខាងក្រោមនេះគឺជាវិធីសាស្ត្រដែលអាចព្យាបាលជំងឺគេងមិនលក់ និងជួយលោកអ្នកឱ្យទទួលបានការទទួលដំណេកបានស្កប់ស្កាល់៖

១. រក្សាម៉ោងទទួលទានដំណេកឱ្យបានទៀងទាត់៖ អ្នកត្រូវគេង និងក្រោកពីគេងឱ្យបានទៀងម៉ោងជាប្រចាំ។ ដូច្នេះត្រូវជ្រើសរើសពេលវេលាណាដែលអ្នកមានអារម្មណ៍ថានឿយហត់ និងត្រូវការគេង។

២. បង្កើតបរិយាកាសនៅកន្លែងដេកមានភាពស្រស់ថ្លា៖ បន្ទប់គេងរបស់អ្នកគួរតែជាកន្លែងដែលមានសណ្តាប់ធ្នាប់ និងរបៀបរៀបរយ។ អ្នកក៏ត្រូវគ្រប់គ្រង សីតុណ្ហភាពក្នុងបន្ទប់ ពន្លឺ និងសំឡេងរំខានផងដែរ ដើម្បីឱ្យបរិយាកាសនៅក្នុងបន្ទប់គេងជួយជំរុញដល់ការគេងរបស់អ្នក។ ប្រសិនបើអ្នកមានសត្វចិញ្ចឹមដេកជាមួយអ្នក អ្នកអាចគិតគូរយកវាទៅដាក់កន្លែងផ្សេងក្នុងករណីដែលវារំខានដល់ដំណេករបស់អ្នក។

៣. ត្រូវធានាថាគ្រែរបស់អ្នកផ្តល់ផាសុកភាពដល់អ្នក៖ វានឹងផ្តល់ផលលំបាកក្នុងការគេងនៅលើពូកដែលទន់ពេក ឬរឹងពេក ឬក៏គ្រែនោះមានសភាពចាស់ទ្រុឌទ្រោមឬតូចពេក។

៤. ធ្វើលំហាត់ប្រាណឱ្យបានទៀងទាត់៖ រៀបចំការធ្វើលំហាត់ប្រាណជាសកម្មភាពចម្បង និងទៀងទាត់ ដូចជា ហែលទឹក ឬដើរ ជាដើម។ ការធ្វើបែបនេះអាចជួយឱ្យអ្នកលុបបំបាត់នូវភាពតានតឹងដែលមាននៅក្នុងខ្លួនអ្នក។ ប៉ុន្តែត្រូវចាំថា អ្នកមិនត្រូវធ្វើលំហាត់ប្រាណដែលបញ្ចេញថាមពលច្រើនហួសហេតុ ដូចជារត់ ឬនៅក្នុងក្លឹបប្រាណ កៀកម៉ោងគេងនោះទេ ព្រោះវាមិនអាចឱ្យអ្នកគេងលក់ស្កប់ស្កល់ឡើយ។

៥. កាត់បន្ថយការទទួលទានរបស់ដែលផ្ទុកសារធាតុកាហ្វេអ៊ីន៖ ជាពិសេសនៅពេលល្ងាច អ្នកគួរកាត់បន្ថយការទទួលទានតែ កាហ្វេ ឬភេសជ្ជៈថាមពល ព្រោះសារធាតុកាហ្វេអ៊ីនរំខានដល់ដំណើរការនៃការគេង និងបង្ការការគេងលក់បានស្កប់ស្កល់ផងដែរ។ ជំនួសឱ្យការទទួលទានសារធាតុទាំងនោះ អ្នកអាចទទួលទានភេសជ្ជៈក្តៅ ទឹកដោះគោ ឬតែប្រភេទឱសថរុក្ខជាតិជាដើម។

៦. កុំសប្បាយភ្លេចខ្លួន៖ ការទទួលទានចំណីអាហារ ឬភេសជ្ជៈផ្ទុកសារធាតុអាល់កុល ជាពិសេសនៅពេលយប់ អាចរំខានដល់ការទទួលទានដំណេកររបស់អ្នកបាន។ ភេសជ្ជៈផ្ទុកសារធាតុអាល់កុលអាចជួយឱ្យអ្នកងងុយគេងភ្លាមៗ ប៉ុន្តែវានឹងរំខានដល់ការគេងរបស់អ្នកនាពេលបន្ទាប់ ឬពេលយប់ជ្រៅ។

៧. កុំជក់បារី៖ នីកូទីន គឺជាសារធាតុដែលជំរុញអ្នកមានភាពសកម្មឬមានថាមពល។ អ្នកដែលជក់បារីប្រើប្រាស់ពេលវេលាយូរក្នុងការគេងលក់ និងក្រោកពីដំណេក ហើយថែមទាំងរំខានដល់ការគេងជាញឹកញាប់ផងដែរ។

៨. រកពេលលំហែមុនពេលចូលគេង៖ អ្នកអាចមុជទឹកក្តៅឧណ្ណៗ ស្តាប់តន្រ្តី ឬធ្វើលំហាត់យ៉ូហ្កា ដើម្បីលំហែផ្លូវអារម្មណ៍ និងខ្លួនប្រាណរបស់អ្នក។

៩. កត់ត្រាក្តីកង្វល់របស់អ្នក៖ ប្រសិនបើអ្នកចេះតែដេកគិតពីអ្វីដែលត្រូវតែធ្វើ ឬដោះស្រាយនៅថ្ងៃបន្ទាប់ អ្នកត្រូវរៀបចំពេលវេលាមួយមុនពេលចូលគេង ដើម្បីរៀបចំផែនការសម្រាប់ថ្ងៃនោះ។ ការធ្វើបែបនេះមានគោលបំណងក្នុងការចៀសវាងការដេកគិតអំឡុងពេលគេង។

១០. ប្រសិនបើគេងមិនលក់ គួរតែក្រោកឡើងវិញ៖ ប្រសិនបើអ្នកគេងមិនលក់ អ្នកត្រូវក្រោកឡើង ហើយធ្វើអ្វីម្យ៉ាងដែលអាចធ្វើឱ្យអ្នកមានភាពស្រស់ស្រាយ រហូតដល់អ្នកមានអារម្មណ៍ថាងងុយគេងវិញ។

ចែករំលែកទៅកាន់បណ្តាញសង្គម