BTS គ្រោងនឹងជួបជាមួយប្រធានាធិបតី Joe Biden នៅថ្ងៃអង្គារ ទី ៣១ ខែ ឧសភា ខាងមុខនេះ នៅសេតវិមាន White House ដើម្បីពិភាក្សាអំពីការ «ការស្អប់ខ្ពើមជនជាតិអាស៊ី» ក៏ដូចជាអបអរ ខែនៃបេតិកភណ្ឌជនជាតិដើមកោះហាវ៉ៃ/ប៉ាស៊ីហ្វិក របស់ជនជាតិអាមេរិក និងអាស៊ី ផងដែរ។ នេះបើ យោងតាមសេចក្ដីជូនដំណឹងរបស់ White House នៅថ្ងៃទី ២៦ ខែឧសភា នេះ។
គួរបញ្ជាក់ផងដែរថា ចាប់តំាងពីដើមឆ្នាំ២០២០ ក្រោយការផ្ទុះឆ្លងរាតត្បាតជាសកលនៃជំងឺកូវីដ១៩ដែលមានប្រភពមកពីទីក្រុង Wuhan ប្រទេសចិន នៅក្នុងសហរដ្ឋអាមេរិក មានការកើនឡើងនូវឧក្រិដ្ឋកម្មស្អប់ខ្ពើមជាតិសាសន៍អាស៊ី ស្ទើរគ្រប់រូបភាពចាប់ពីការបញ្ចេញកាយវិកាស្អប់ខ្ពើម ការជេរប្រមាថ ការលួចវាយឆ្មក់ដោយហិង្សា ឬ ការប្រើហិង្សាដោយចំហ ការលួចបំផ្លិចបំផ្លាញទ្រព្យសម្បត្តិ រហូតដល់ការបាញ់សម្លាប់ ឬប៉ុនប៉ងចាក់សម្លាប់ជាដើម។
