នៅរសៀលថ្ងៃអាទិត្យ ទី២៩ ខែឧសភា ឆ្នាំ២០២២ នេះ ក្រុមហ៊ុនអាកាសចរណ៍ ឯកជន តារ៉ា អ៊ែរ (Tara Air) បាននិយាយថា យន្តហោះប្រភេទ ធ្វីន អូតឺ (Twin Otter) របស់ខ្លួន បានបាត់នៅក្នុងប្រទេសនេប៉ាល់កាលពីថ្ងៃអាទិត្យជាមួយនឹងមនុស្ស 22 នាក់នៅលើយន្តហោះ។
លោក Sudarshan Bartaula អ្នកនាំពាក្យក្រុមហ៊ុន Tara Air បានប្រាប់ AFP ថា “ជើងហោះហើរក្នុងស្រុកមួយដែលបានធ្វើដំណើរទៅកាន់ Jomsom ពី Pokhara បានបាត់បង់ទំនាក់ទំនង” លោកបាននិយាយថា មានអ្នកដំណើរ១៩នាក់នៅលើយន្តហោះ និងសមាជិកនាវិក៣នាក់ ។
យន្តហោះនោះ មានគោលដៅធ្វើដំណើរ ពីទីក្រុងទេសចរណ៍ ប៉ូការ៉ា (Pokhara) ចម្ងាយប្រហែល២០០គីឡូម៉ែត្រ ពីភាគពាយព្យ រដ្ឋធានីកដ្ឋមណ្ឌូ ឆ្ពោះទៅកាន់ទីក្រុង ចូមសុម (Jomsom) ដែលស្ថិតចម្ងាយប្រហែល ៨០គីឡូម៉ែត្រ ពីភាគពាយព្យនៃទីក្រុង Pokhara។ វាត្រូវគេរំពឹងថា នឹងប្រើពេលធ្វើដំណើរត្រឹម ១៥នាទីប៉ុណ្ណោះ ប៉ុន្តែបានដាច់ការទាក់ទង ក្រោយហោះឡើងបានតែបន្តិច។