អ្នកបើករថយន្តដឹកទំនិញម្នាក់បានសារភាពថា មានចេតនាយករថយន្តដឹកទំនិញខ្នាតធំរបស់គាត់ចូលទៅក្នុងផ្ទះរបស់មិត្តស្រីរបស់គាត់ ខណៈពេលដែលកូនៗពីរនាក់នៅខាងក្នុង។
Derek Wellington បានជិះបំបុកចំនួនពីរដងចូលទៅក្នុងផ្ទះមិត្តស្រីគាត់នៅសង្កាត់ East Kilbride ទីក្រុង South Lanarkshire ដែលបណ្តាលឱ្យមនុស្សចំនួនចំនួនប្រាំពីរផ្ទះត្រូវបានជម្លៀសចេញ និងផ្ទះចំនួនពីរល្វែងត្រូវបានបំផ្លាញ។
វិក័យប័ត្រសម្រាប់ការខូចខាតបានឈានដល់ ៤៧៥.០០០ផោន ឬស្នើនឹង៥៧៥.៥០០ដុល្លារ។
Wellington បានសារភាពកំហុសចំពោះការចោទប្រកាន់មួយចំនួនរួមទាំងការប្រព្រឹត្តដោយពិរុទ្ធភាព និងមិនខ្វល់ពីសុវត្ថិភាពអាយុជីវិតអ្នកដទៃ។
បុរសអាយុ ៣៤ ឆ្នាំរូបនេះបាននៅក្រៅឃុំ បន្ទាប់ពីឧប្បត្តិហេតុមុនដែលគាត់បានជិះរថយន្តដឹកទំនិញបំបុកផ្ទះមិត្តស្រី Sara Cassidy ។
គាត់ត្រូវបានគេប្រាប់ឱ្យនៅឱ្យឆ្ងាយពីស្ដ្រីអាយុ ៣៣ ឆ្នាំបន្ទាប់ពីវាយក្បាលនាង អូសនាងខ្ទប់នឹងជញ្ជាំង។
ប៉ុន្តែទោះបីជាមានដីការបស់តុលាការក៏ដោយ ក៏ប្តីប្រពន្ធនេះបានបន្តទំនាក់ទំនង ហើយគាត់បានទូរស័ព្ទទៅនាងម្តងហើយម្តងទៀត នៅថ្ងៃកើតហេតុ ឡានដឹកទំនិញបំបុកផ្ទះនាងកាលពីថ្ងៃទី ៦ ខែកញ្ញាឆ្នាំមុន។
តុលាការជាន់ខ្ពស់នៅទីក្រុង Glasgow ប្រទេសស្កុតឡែនបានដឹងថា Wellington បានបើកបរទាំងកំហឹង និងស្រវឹងជោគជាំ បន្ទាប់ពីលោកស្រី Cassidy មិនព្រមជួបគាត់។
គាត់បានស្រែកដាក់ទូរស័ព្ទទៅនាងថា “អញនឹងជិះឡានដឹកទំនិញទៅលេងដល់ក្នុងបន្ទប់របស់នាងឯង”។
បន្ទាប់ពីការស្រែកដាក់ទូរស័ព្ទនោះហើយ Sara Cassidy បានព្យាយាមលួងលោមចិត្តគាត់ឱ្យត្រជាក់ដោយសារមានក្មេងនៅផ្ទះពីរនាក់នៅទីនោះ។ តែគាត់មិនស្ដាប់ទេ ហើយនាងក៏មានការផិតភ័យពេលឃើញគាត់ជិះឡានដឹកទំនិញខ្នាតធំនោះកាត់ផ្លូវ។
តែជាសំណាងល្អ មិនមានមនុស្សរងរបួសឡើយ និងខ្ទេចតែរថយន្ត និងផ្ទះល្វែងពីរខ្នងប៉ុណ្ណោះ៕