អង្គការមូលនិធិថែទាំសុខភាពអ្នកជំងឺអេដស៍ រៀបចំទិវាពិភពលោកប្រយុទ្ធនឹងជំងឺអេដស៍ឆ្នាំ២០២២ ក្រោមប្រធានបទ «មិនទាន់បញ្ចប់ទេ» នៅខេត្តស្វាយរៀង

(ស្វាយរៀង)៖ នាព្រឹកថ្ងៃទី២៦ ខែវិច្ឆិកា ឆ្នាំ២០២២ អង្គការមូលនិធិថែទាំសុខភាពអ្នកជំងឺអេដស៍ (AHF) បានប្រារព្ធទិវាពិភពលោកអេដស៍ឆ្នាំ២០២២ ក្រោមប្រធានបទ «វាមិនទាន់បញ្ចប់ទេ» ដើម្បីរំលឹកដល់មេដឹកនាំពិភពលោក ស្ថាប័នសុខភាពសាធារណៈពិភពលោក និងសង្គមស៊ីវិលថា ការងារជាច្រើនទៀតនៅតែមាន ប្រសិនបើយើងចង់បញ្ចប់ការរីករាលដាលនៃជំងឺអេដស៍ នៅថ្ងៃណាមួយ។

យោងតាមស្ថិតិថ្មីបំផុតរបស់ UNAIDS មនុស្សជាង ៣៨ លាននាក់កំពុងរស់នៅជាមួយមេរោគអេដស៍/ជំងឺអេដស៍ នៅទូទាំងពិភពលោក ហើយមនុស្សជាង ៤០ លាននាក់បានស្លាប់ ដោយសារជំងឺដែលទាក់ទងនឹងជំងឺអេដស៍ ចាប់តាំងពីការចាប់ផ្តើមនៃការរីករាលដាលនៃមេរោគអេដស៍។ ខណៈពេលដែលមនុស្សរាប់លាននាក់សព្វថ្ងៃនេះ កំពុងទទួលបានការព្យាបាលដោយថ្នាំប្រឆាំងមេរោគអេដស៍ មនុស្សរាប់លាននាក់ទៀតនៅតែត្រូវការវាយ៉ាងខ្លាំង។

ដូចនេះហើយទើប អង្គការមូលនិធិថែទាំសុខភាពអ្នកជំងឺអេដស៍ រៀបចំទិវាពិភពលោកប្រយុទ្ធនឹងជំងឺអេដស៍ឆ្នាំ២០២២ ក្រោមប្រធានបទ «មិនទាន់បញ្ចប់ទេ» និងអំពាវនាវឱ្យភាគីពាក់ព័ន្ធ និងអ្នកតស៊ូមតិក្នុងប្រទេសទាំងអស់ បង្កើនកិច្ចខិតខំប្រឹងប្រែងការពារ ការធ្វើតេស្ត និងការព្យាបាលមេរោគអេដស៍នៅទូទាំងពិភពលោក ដើម្បីកាត់បន្ថយអត្រាឆ្លងមេរោគអេដស៍ថ្មី ដែលកំពុងកើនឡើងយ៉ាងឆាប់រហ័ស និងការពារផលប្រយោជន៍ដ៏មានតម្លៃ ដែលយើងបានធ្វើកន្លងមក។

ទិវាពិភពលោកប្រយុទ្ធនឹងជំងឺអេដស៍ឆ្នាំ២០២២ រៀបចំដោយ អង្គការ AHF ក្រោមអធិបតីភាពលោក សុខា រាម អភិបាលរងខេត្តស្វាយរៀង និងមានការចូលរួមពីលោក វេជ្ជបណ្ឌិត អ៊ុក វិជ្ជា ប្រធានអាជ្ញាធរជាតិប្រយុទ្ធនិងជំងឺអេដស៍ សើស្បែក និងកាមរោគ, លោកវេជ្ជបណ្ឌិត ឈឹម សារ៉ាត់ នាយកប្រចាំតំបន់អាស៊ី អង្គការ AHF, លោកបណ្ឌិត Yugang Bao នាយករងប្រចាំតំបន់អាស៊ី អង្គការ AHF លោក ខៀវ សំអុល ប្រធានមន្ទីរអប់រំយុវជន និងកីឡា លោកវេជ្ជបណ្ឌិត ថោង អុំសុធា អនុប្រធានមន្ទីរសុខាភិបាល លោកស្រីវេជ្ជបណ្ឌិត ហួយ ស៊ីខេង ប្រធានកម្មវិធីប្រចាំប្រទេសកម្ពុជា អង្គការ AHF រួមទាំងមានលោកគ្រូ អ្នកគ្រូ និងសិស្សានុសិស្សសរុបជិត ៦០០នាក់។