iPhone 14 ត្រូវបានគេរំពឹងថានឹងក្លាយជាខ្សែស្រឡាយកំពូលស្មាតហ្វូនបន្ទាប់របស់ក្រុមហ៊ុន Apple នៅក្នុងឆ្នាំ ២០២២ នេះ។ ហើយមានពាក្យចរចាមអារ៉ាមជាច្រើនហូរហែរផងដែរត្រូវបានលេចលឺទាក់ទងជាមួយការរចនារូបរាង តម្លៃ ក៏ដូចជាមុខងារថ្មីៗជាច្រើនដែលនឹងត្រូវបានបំពាក់លើត្រកូល iPhone ជំនាន់ចុងក្រោយនេះ។
តែទោះជាយ៉ាងណា ទាក់ទិនទៅនឹងថ្ងៃ ឬកាលបរិច្ឆេទនៃការប្រកាសចេញរបស់ខ្សែស្រឡាយ iPhone 14 គឺនៅមិនទាន់លេចធ្លាយជាពត៌មានណាមួយដែលយើងអាចយកធ្វើជាតម្រុយបាននៅឡើយទេ ខណៈដែលកាលពីព្រឹត្តិការណ៍ WWDC ឆ្នាំ ២០២២ កាលពីថ្ងៃទី ០៦ មិថុនា កន្លងទៅ Apple បានប្រកាសចេញតែប្រព័ន្ធប្រតិបត្តិការណ៍ចុងក្រោយរបស់ខ្លួនគឺ iOS 16 ប៉ុណ្ណោះ ដោយមិនបានបង្ហើបឲ្យដឹងថាពេលណាស្មាតហ្វូនកំពូលចុងក្រោយរបស់ខ្លួននឹងលេចចេញជារូបរាងនៅលើផែនដីនេះនៅឡើយ។
ងាកត្រលប់ទៅកាន់អតីតកាលបន្តិច កាលពីខ្សែស្រឡាយ iPhone 13 គឺក្រុមហ៊ុន Apple បានប្រកាសចេញវាជាផ្លូវការនៅថ្ងៃអង្គារ ទី ១៤ កញ្ញា ក្នុងឆ្នាំ ២០២១ ហើយបានដាក់ឲ្យអ្នកគាំទ្រធ្វើការកម្មង់នៅថ្ងៃសុក្រ ទី ១៧ និងបានចេញលក់ជាផ្លូវការនៅថ្ងៃ ២៤ នៃខែឆ្នាំដដែល។
ដូច្នេះសម្រាប់ iPhone 14 ក្រុមហ៊ុន Apple អាចនឹងធ្វើការប្រកាសចេញជាផ្លូវការនៅចន្លោះថ្ងៃអង្គារដែលត្រូវនឹងថ្ងៃទី ០៦ កញ្ញា ឆ្នាំ ២០២២ នេះ ឬនៅថ្ងៃអង្គារនៃសប្ដាហ៍បន្ទាប់គឺថ្ងៃទី ១៣ កញ្ញា ខណៈដែលថ្ងៃដាក់ឲ្យធ្វើការកម្មង់គឺនៅថ្ងៃសុក្រនៃសប្ដាហ៍តែមួយ មានន័យថា Apple អាចនឹងបើកទទួលការកម្មង់សម្រាប់ស្មាតហ្វូនជំនាន់ចុងក្រោយរបស់ខ្លួននៅថ្ងៃសុក្រទី ០៩ ឬថ្ងៃសុក្រទី ១៦ កញ្ញា ឆ្នាំ ២០២២ ។
ប្រភព ៖ CNET
